Veur de talrieke kinderen wieren d’r smiddags meestal wat spelletjes eholden, as beloning kregen ze dan ‘n reep Kwatta (met saldäötjen). Umdat ze van dat spöllen ook dös kregen, was d’r een löäge melkbusse enommen. De bestuursleden gotten hoogstpersoonlijk ’n paar flessen ranja in de busse, waornao ze um volpompten. Zo kreeg elk kind wat te drinken.
Toen d’r steeds meer mensen zelf een auto kregen, liep de belangstelling veur ‘t buurtreisje van KHV terugge. Bergervoet van de Gietelinkdiek zat in de naodage van de vereniging in ’t bestuur. Met völle moeite hadden ze genog volk evonnen dat met wol, maor ‘n paar dage veur tied kwammen ze de Gietelinkdiek in. Den een had dit, d’n ander dat. Op ’t leste kwam ’t veur dat zich zovölle hadden af-emeld dat de bus amper half vol zat. Dan mossen ze op zondagmargen eers nog ’t darp deur um te kieken of tlr nog liefhebbers waren die met wollen. Up ’t leste lukken dat ok niet meer en kwam ‘t ende in zicht.
D’r werd toen nog ‘n ledenvergadering bi-j de Zandheuvel ehollen, maor daor kwam alleen ‘t bestuur zelf opdraven. In ’n leste poging um d’r nog wat van te maken, schreef ’t bestuur ’n ni-je vergadering uut. Toen bleef zelfs de helfte van ’t bestuur vot, zodat Koolhoven Heide Veuruut maor meteen werd op-eheven.
Wat ons rest bunt 2 groepsfoto’s van dertig volwassenen en zo’n 60 blagen, zollen die allemaol in één bus hebben ezetten?
Lees verder op pagina 3