‘n Poloneze heuren der ok altied bij. Eers ging ‘t achter mekare an en dan wier der met twee man ’n soort bruggetjen emaak waor iederene onderdeur mos. Op de maote van de meziek wier der op de rugge eklop van de onderdeurgangers. A’j der eentje niet zo goed moggen dan ko’j mooi de voes anhaaln en ‘m ‘s goed op de rugge slaon. A’j bukken mot en naor onder kiek ko’j toch niet ziene wie dat edaon had. At de meziek der met uutscheien ging ‘t glas op de krane en kwammen ze rond met breudjes en koffie. Dan ging ok iederene op huus an. ‘n Enkeln stok nog gauw ‘n sigare in tesse.
De cafeholders met die grote zalen heb ‘t niet makkelijk en langzaam maor zeker verdwient ze allemaol. Grote brulften geven ziej haos niet meer. Sins de ramp in Volendam is de brandweer zo scharp ewodden en stelt zukke soms aoverdreven eisen da’j as zaalholder soms de helfte van ow capaciteit mot inlevern. Dan kump de gemeente met geluudeisen die haos niet te doene bunt wat kosten betref ‘t Rookverbod waor de helfte van ‘t fees buten ston, warken ok niet met an de gezelligheid.
Zeker is roken bewezen slech en alleen maor goed da’w der met uutscheid. ’t Was wel ’n stuksken gezelligheid en kiek maor ‘s naor ’n filmpjen uut de jaoren vieftig. Bi-j ‘n betjen vergadering van de banke of van de bond ging eers de sigarendeuze rond en stokken ze allemaole zo’n gepoeierden bolknak an. Nao vief minuten ko’j mekare al haos niet meer ziene van de rook.
De tied verandert en dat is ok goed, maor feeshollen doet ze toch wel. In onze streek hebbe wi-j gelukkig zovölle clubs en verenigingen waor de barbecues rook in de zommerdag en in de winter zuukt de mensen mekare ok wel op. Gelukkig laeve wi-j in ‘n streek woor gezellegheid en goed met mekare umgaon nog belangriek is.
Gelukkig staode wi-j as Achterhoeker hierveur bekend.